di Franco Blefari
Continua dopo la pubblicità...
‘U gustu meu è ‘i vaju ‘nta campagna,
aundi staciarrìa jornati ‘nteri,
pammi rricchju ‘nta ll’ura cchjù sulagna,
‘a vuci funda di li me’ penseri.
‘U gustu meu è ‘i trovu cannauci,
riganegliu serbaggiu ‘i cogghju ammuzzu,
mur’‘e ruvèttu, ‘i chiglia bella duci,
e pamm’’a lavu cu ll’acqua du’ puzzu.
‘U gustu meu è ‘i zzapp’a mmatinata,
quandu s’accendi ‘u suli e ncign’‘a vita;
‘i ‘ncannu pumadora pa ‘nsalata;
e ‘i mbivu ‘nta ‘nu cùccumu di crita.
‘U gustu meu è l’umbr’‘e ‘na nucàra,
quand’’a sidura canalìj’‘a pegli;
‘i mangiu fica sup’a ‘na ficara,
gott’e cerasa cacati d’arcegli.
‘U gustu meu, rrivat’a chist’etati,
esti glia terra chi mi nsonn’a notti,
camp’‘i lavuru di li me’ antinati
e chi tantu godiri non mi potti.
27/05/2006